Saltar ao contido principal
Xornal

Nature Medicine publica un traballo da USC e Cambridge que descubre un novo mecanismo polo cal as hormonas tiroideas regulan a masa corporal

Identifícanse novas dianas para o tratamento de alteracións da masa corporal e a obesidade

Actualizada: 03-09-2010 08:53 . INVESTIGACIÓN
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Imaxe do traballo publicado en Nature Medicine
Investigadores das Universidades de Santiago e Cambridge acaban de publicar en Nature Medicine, unha das revistas de maior impacto no campo da Biomedicina e a de maior prestixio e impacto en Medicina Experimental, un traballo –‘ Hypothalamic AMPK and fatty acid metabolism mediate thyroid regulation of energy balance‘- que abre unha nova área de estudo no campo da regulación da masa corporal e a obesidade. A investigación descubre un mecanismo polo que as hormonas tiroideas regulan a masa corporal á vez que identifica novas dianas para o tratamento de alteracións da masa corporal e a obesidade.
 
O grupo de Miguel López e Carlos Diéguez, da Universidade de Santiago de Compostela-Instituto de Investigación Sanitaria e do Centro de Investigación Biomédica en Rede da Fisiopatoloxía da Obesidade e Nutrición (CIBERobn), en colaboración co equipo de Antonio Vidal-Puig, da Universidade de Cambridge (UK), descubriu un novidoso mecanismo mediante o cal as hormonas tiroideas regulan ese balance enerxético actuando nunha zona do encéfalo, o hipotálamo, especializada na regulación endocrina, a inxesta e a masa corporal.
 
Os investigadores demostraron que as hormonas tiroideas modulan o metabolismo lipídico (das graxas) no hipotálamo, e como consecuencia deste efecto estimúlase a actividade dos nervios (sistema nervioso simpático) que inervan o tecido adiposo pardo, onde se incrementa a expresión de xenes implicados na produción de calor corporal. En concreto, as accións no ámbito hipotalámico están medidas pola kinasa regulada por AMP (AMPK; do inglés, AMP-activated protein kinase).
 
Facilitar perda de peso
A relevancia patofisiolóxica deste novo mecanismo queda demostrada polo feito de que é posible actuar no hipotálamo mediante métodos farmacolóxicos ou xenéticos e reverter así os efectos nocivos do hipertiroidismo sobre o peso corporal.
 
Os resultados suxiren que este mecanismo hipotalámico podería ser utilizado para activar o tecido adiposo pardo e inducir a perda de peso. Ademais, proporciónanse novas dianas terapeúticas para o tratamento de enfermidades asociadas á diminución masiva do peso corporal.
 
Hipertiroidismo e gasto enerxético
As hormonas tiroideas son importantes reguladores do balance enerxético e da masa corporal ademais de regular a temperatura estimulando un tipo especial de graxa denominada tecido adiposo pardo. Aínda que tradicionalmente se considerou que en humanos o tecido adiposo pardo era unicamente significativo en recén nacidos, datos obtidos no último ano poñen de manifesto a súa gran relevancia na modulación da masa corporal tamén en adultos.
 
Os pacientes con elevados niveis de hormonas tiroideas, unha patoloxía coñecida como hipertiroidismo, caracterízanse pola súa delgadez a pesar de presentar unha elevada inxesta como consecuencia dun incremento do gasto enerxético que ata a data se lle atribuía á acción directa das devanditas hormonas sobre tecidos periféricos.