Saltar ao contido principal
Xornal  »  O profesor César Domínguez nomeado membro da Academia Europaea

O profesor César Domínguez nomeado membro da Academia Europaea

Actualizada: 03-02-2011 14:40
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

O profesor de Literatura Comparada da USC César Dominguez acaba de ser nomeado membro da Academia Europeae (‘The Academy of Europe’), fundada en 1988 e que conta con máis de dous mil membros entre especialistas en ciencias físicas, tecnoloxía, bioloxía, medicina, matemáticas, economía, dereito, ciencias cognitivas e humanidades. Esta Academia promove a investigación no ámbito europeo, con especial atención pola interdisciplinariedade e a identificación de temas de carácter transeuropeo a través dun amplo programa de actividades.

O nomeamento do profesor Domínguez, concretamente na Sección de Estudos Literarios, ten relación coas súas investigacións sobre a idea de literatura europea e as súas máis recentes reformulacións no ámbito da Unión Europea, con especial atención polos desafíos que suscita un novo achegamento á literatura europea no marco do espazo común de educación. A este respecto cómpre destacar o último proxecto de investigación do que é investigador principal “Europa, en comparación: UE, identidade e a idea de literatura europea”, financiado polo Ministerio de Ciencia e Innovación e no que participan os tamén investigadores da USC Silvia Alonso, Federica Angelini, Marco Paone e Darío Villanueva xunto a investigadores das universidades de Dinamarca do Sur, Lisboa, Mainz e Roma.

Os primeiros froitos desta liña de investigación son a participación en proxectos internacionais de publicacións dedicados á investigación da migración en Europa e á propia conceptualización da literatura europea, así como, no ámbito docente, a oferta na USC de novas materias de alcance europeo no grao (‘Traxectorias da literatura europea’, impartida xunto a Fernando Cabo) e no máster (‘Europa como xeografía literaria’). A cerimonia de ingreso na Academia Europaea terá lugar en París en setembro de 2011 con ocasión da celebración do XXIII congreso anual.