Saltar ao contido principal
Xornal

Escolares de 24 países participan no campionato do mundo de modelado 3D de precisión con teléfono móbil

A D3Mobile Metrology World League, organizada polo grupo de investigación USCAN3D da Universidade de Santiago, conta con participantes de catro continentes

Actualizada: 24-02-2014 10:37
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Logo promocional da D3Mobile Metrolgoy World League

A D3Mobile Metrology World League, un campionato internacional de modelado 3D de precisión con teléfono móbil pioneiro a nivel mundial e ideado e promovido polo Grupo de Investigación para a Documentación en 3D (USCAN3D) da Escola Politécnica Superior do Campus de Lugo da Universidade de Santiago de Compostela, dirixido pola profesora Mariluz Gil Docampo, en colaboración con outras entidades e organismos nacionais e internacionais, espertou o interese de profesores e alumnos pertencentes a 142 centros educativos de 24 países de Europa, América, Asia e África.

 
Os máis de 200 equipos participantes nesta segunda edición do campionato xa comezaron a traballar, aplicando os seus coñecementos de matemáticas, física, debuxo, informática e tecnoloxía a un xogo de investigación no modelado 3D de precisión, a metroloxía e a fotogrametría. 
 
Os organizadores deste certame, dirixido a escolares nados entre 1996 e 1998, pretenden fomentar as vocacións científicas entre os mozos/as, que serán os/as responsables de que a investigación conte coa relevancia que merece na sociedade futura, pero a D3Mobile Metrology World League tamén busca divulgar a importancia que para a sociedade moderna ten a metroloxía, a cultura xeográfica ou a accesibilidade, ademais de darlle un pulo á promoción da Universidade de Santiago de Compostela entre todo o colectivo escolar.
 
Os participantes deberán levar a cabo dúas probas nas que terán que efectuar medidas sobre diversos obxectos. A segunda das probas permitiralles obter un modelo 3D que será valorado por votación popular de todo o público do campionato durante o mes de maio. Os equipos que realicen mellores medicións e reciban máis votos poderán gañar algúns dos premios, entre os que se atopa este ano unha raqueta doada por Rafa Nadal e cun autógrafo do tenista balear. A D3Mobile Metrology World League pódese seguir a través da web www.d3mobile.es, así como en facebook, twitter ou na canle youtube.
 
OS investigadores da USC responsables da organización deste torneo, que harmoniza lecer e investigación, agradecen publicamente a participación de todos os centros educativos, profesores e estudantes inscritos, xa que esta actividade só pode ser levada a cabo grazas ao seu esforzo e entusiasmo. 
 
O director da D3Mobile Metrology World League, o profesor da USC Juan Ortiz, salienta tamén o seu agradecemento polo financiamento e os premios achegados pola Fundación Española para a Ciencia e a Tecnoloxía (FECYT), o Centro Español de Metroloxía (CEM) o Centro Nacional de Información Xeográfica (CING), a Fundación Vodafone España, a Xunta de Galicia, a Excma. Deputación Provincial de Lugo, a Asociación de Centros Autónomos de Ensino Privado (ACADE), a Fundación Europea Educación e Liberdade (FUNDEL), a Sociedade Latinoamericana de Ciencia e Tecnoloxía (SOLACYT e a empresa PCE-Instruments.
 
Ortiz destaca asemade a importante contribución que teñen neste proxecto as entidades, organizacións e institucións colaboradoras, entre as que figuran empresas de ámbito tecnolóxico, como Autodesk, gobernos autonómicos como o de Navarra, a Xunta de Castela e León ou o de Murcia, a Confederación Española de Centros de Ensino (CECE), a Confederación Española de Asociacións de Pais de Alumnos (CEAPA), ANPE Sindicato Independente, a Federación de Sindicatos Independentes de Ensino (FSIE) e a Central Sindical Independente de Funcionarios (CSI-F).