Saltar ao contido principal
Xornal  »  O Laboratorio de Radon de Galicia recibe tres premios de investigación

O Laboratorio de Radon de Galicia recibe tres premios de investigación

Actualizada: 20-06-2017 09:44
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Membros do Laboratorio de Radon de Galicia que dirixe o profesor da USC Juan Miguel Barros Dios recibiron recentemente tres premios pola súa actividade de investigación. O laboratorio conta con 25 anos de experiencia na medición de radon interior e elaborou o mapa de radon de Galicia.

Un deses recoñecementos foi para María Torres, neumóloga do Hospital Álvaro Cunqueiro de Vigo, pola presentación do traballo ‘Exposición a radon residencial e risco de cancro de pulmón de célula pequena. Resultados preliminares do estudo SMALL CELL’. O premio foi á mellor comunicación na Área de Enfermidades Respiratorias de orixe ambiental da Sociedade Española de Neumoloxía e Cirurxía Torácica (SEPAR).

Asemade, a residente de Oncoloxía Ángeles Rodríguez Martínez, doutoranda do grupo de investigación, recibiu o terceiro premio na categoría do mellor artigo publicado do Colexio Oficial de Médicos de Pontevedra polo traballo ‘Cáncer de pulmón microcítico. Metodología y resultados preliminares del estudio SMALL CELL’.

Ambos os dous dous premios enmárcanse nun proxecto de investigación no que participan 11 hospitais de catro comunidades autónomas e Portugal, baseado no estudo dos factores de risco do cancro de pulmón de célula pequena, un dos tumores pulmonares máis agresivos. O estudo, dirixido polo profesor da USC Alberto Ruano Raviña, é financiado polo Instituto de Saúde Carlos III.

Finalmente, o Laboratorio tamén acaba de ser premiado pola Sociedad Castellano-Leonesa y Cántabra de Patología Respiratoria (SOCALPAR) polo proxecto de investigación ‘Exposición al radón residencial y riesgo de cáncer de pulmón. Estudio de casos y controles en la Comunidad de Castilla y León’. A investigadora principal do proxecto é a doutora Magdalena Serradilla, neumóloga do Hospital de Ávila.