Saltar ao contido principal
Xornal  »  Dez promocións de talento matemático galego

Dez promocións de talento matemático galego

Estalmat-Galicia cumpre o seu décimo aniversario reunindo en Matemáticas os seus estudantes e egresados

Actualizada: 17-07-2017 14:26
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Como non podía ser doutra maneira, os máis de 70 rapaces e rapazas que este sábado participaron no encontro E4G-2017 para conmemorar o décimo aniversario de Estalmat-Galicia celebraron a efeméride cunha batalla matemática e un xogo de rol.

A Facultade de Matemáticas foi o escenario dun emotivo encontro, que congregou as dez promocións do programa de estímulo do talento matemático que xa cursaron polo menos un curso. O programa da xornada comezou cunha benvida na que participaron a coordinadora xeral do programa e decana da Facultade, Elena Vázquez Cendón; o comité organizador, e os docentes Victor Pollán, responsable do Campamento Matemático, e Teresa Otero, responsable do estudo de egresados de Estalmat.

A partir de aí comezou o xogo. Os rapaces formaron equipos interxeracionais e durante toda a mañá retáronse en ‘batallas’ con problemas matemáticos preparados seguindo as normas, que son un algoritmo moi lúdico. Xa pola tarde foi a quenda dos xogos de rol, onde todos e todas demostraron as súas destrezas na estratexia matemática. O encontro rematou coa entrega por parte da Asociación Galega de Amigos de Estalmat-Galicia dos agasallos aos premiados do Open Matemático do programa deste curso.

O comité organizador deste encontro estivo formado por catro egresadas e outros tantos egresados. Así, do Grao de Matemáticas da USC formaron parte Alicia Seijas Vázquez, Bárbara Rodríguez Presedo, Elena Blanco González e Fernando Castro Prado; Iago Velasco López, de Ciencias Políticas e da Administración da USC; Luis Antonio López Valcárcel, de Enxeñaría de Tecnoloxías de Telecomunicación da UVigo; Luis Cobas Concheiro, de Enxeñaría Informática da UDC, e Marina López Seoane, do dobre grao de Matemáticas e Física da Universidade de Oviedo.

O Proxecto ESTALMAT-España está pilotado por membros da Facultade de Matemáticas da USC e avalado cientificamente pola Real Academia Española de Ciencias Exactas, Físicas y Naturales e o CSIC. Conta co apoio financeiro da Fundación Española de Ciencia y Tecnología e cun específico da Consellaría de Educación e Ordenación Universitaria e das Deputacións da Coruña e Lugo.