Saltar ao contido principal
Xornal

30 universitarios iberoamericanos lánzanse a emprender no Camiño de Santiago

Spin Way reúne novo talento internacional en Compostela

Actualizada: 05-09-2017 13:01
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Spin Way 2017, aventura emprendedora no Camiño de Santiago , arranca este mércores 6 coa participación de 30 mozos e mozas universitarios de 14 países da rexión iberoamericana cun obxectivo común: crear proxectos empresariais innovadores, sostibles e con potencial para mellorar as súas comunidades e países.

A Universidade de Santiago de Compostela (USC), en colaboración con RedEmprendia, o Organismo Internacional de Juventud para Iberoamérica (OIJ) e o Instituto de la Juventud de España (Injuve) impulsan esta edición 2017 de Spin Way, que conta tamén coa colaboración de Uninova, Xacobeo Galicia e Visualiza Business.

Con Spin Way 2017 emprendedores novos vivirán unha experiencia única de aprendizaxe, esforzo e cooperación que comeza este mesmo mércores 6 a partir das 9.30 horas cun taller formativo no Edificio Emprendia da USC. Nesta xornada recibirán asesoramento experto en temas claves para as súas propostas e que logo terán que poñer a proba durante o Camiño de Santiago.

Serán máis de 100 quilómetros a pé pola ruta do Camiño Francés traballando con mentores que os acompañarán e cos compartirán o seu know-how durante cinco días de aventura, descubrimento e traballo en equipo. Superado o reto na ruta xacobea, os emprendedores enfrontarán un último desafío o día 12 de setembro para defender os seus proxectos ante un xurado nunha competición de Pitch.

Para moitos dos mozos e mozas universitarios que participan no programa, Spin Way 2017 é a primeira oportunidade que teñen de viaxar a outro país e de coñecer e convivir con persoas doutras culturas. Esta é unha experiencia que non so aspira a transformar os seus proxectos en iniciativas de éxito, senón a xerar lazos de amizade e cooperación para o futuro entre mozos/as de toda a rexión iberoamericana e que aspira tamén a favorecer a implementación do Pacto Iberoamericano de Juventud.