Saltar ao contido principal
Xornal

O Campus Terra da USC define este xoves o perfil do xestor cultural para adecualo ao mercado laboral actual e futuro

A vicerreitora de Servizos Universitarios, Carme Silva, inaugurou o foro de debate este mércores na Facultade de Humanidades

Actualizada: 27-09-2017 13:09
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Participantes na primeira xornada do workshop ‘A xestión cultural como espazo profesional’

A Facultade de Humanidades do Campus Terra da USC acolle este xoves 28 de setembro, a partir das 10.00 horas, unha nova sesión do foro de debate ‘A xestión cultural como espazo profesional’, o cal foi inaugurado este mércores pola vicerreitora de Servizos Universitarios do campus de Lugo, Carme Silva Domínguez, e no que se deron cita distintas institucións e empresas especializadas no eido da cultura co gallo de definir o perfil do xestor/a cultural no tocante ás competencias e coñecementos que se demandan no mercado laboral actual e futuro.

 

Fundación Uxío Novoneyra, Asociación Galega de Profesionais da Xestión Cultural, Consello da Cultura Galega, Deputación de Lugo, Rede Museística da Deputación Provincial de Lugo, a Subdirección Xeral de Xestión e Coordinación Cultural da Xunta de Galicia, a Asociación Comercial e Empresarial da Cidade Antiga (ACECA), e o xestor cultural Fran Quiroga, protagonizaron a sesión deste mércores na que se buscou coñecer a percepción dos/as participantes sobre o actual Grao en Ciencias da Cultura e Difusión Cultural da USC e a súa adecuación ás demandas do mercado.

 

Este xoves, novamente no Laboratorio de Idiomas da Facultade de Humanidades do Campus Terra, daranse cita neste foro de debate a Fundación Olga Gallego Domínguez; Asociación de Profesionais dos Arquivos, Bibliotecas, Museos e Centros de Documentación de Galicia; Marcos Lourenzo en representación do título de Experto Universitario en Xestión Cultural; Deputación de A Coruña; Concello de Lugo; Museo Catedralicio de Lugo; Edicións Xerais de Galicia; Arquestudio s.l.; Ouvirmos, s.l.; e Nócomún. Na sesión, os participantes analizarán o futuro do sector en canto a nichos de emprego.

 

Outras imaxes


De esquerda a dereita, Cruz, Silva, Fernández e Vilela, na apertura das xornadas