Saltar ao contido principal
Xornal  »  O catedrático Julián Álvarez Escudero, novo decano de Medicina e Odontoloxía

O catedrático Julián Álvarez Escudero, novo decano de Medicina e Odontoloxía

Actualizada: 11-10-2017 18:12
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Julián Álvarez Escudero, na entrada principal da Facultade de Medicina e Odontoloxía

O catedrático de Anestesioloxía e Reanimación Julián Álvarez Escudero acaba de ser elixido novo decano da Facultade de Medicina e Odontoloxía logo da votación celebrada nunha xunta extraordinaria de Facultade este mércores 11, cun resultado de 112 votos a favor e 23 en branco. Completan a candidatura, única que concorreu ao proceso, os profesores José Martín Carreira Villamor como vicedecano de Docencia Clínica e Jacobo Limeres Posse como vicedecano de Odontoloxía, e as profesoras Ángela J. Torres Iglesias en calidade de vicedecana de Intercambios, Calidade e Innovación Docente e María Teresa Castaño Oreja como secretaria do centro.

Entre o que serán as súas liñas de traballo para os vindeiros anos, Julián Álvarez Escudero avoga polo fortalecemento e renovación do cadro docente mediante a negociación dun plan entre a USC e o Sergas encamiñado á convocatoria de prazas de profesorado acreditado e a vinculación do numerario que así o desexe. O programa do novo equipo inclúe tamén a necesidade dun plan galego que contemple as necesidades reais de profesionais da medicina e a odontoloxía que terá Galicia nos vindeiros anos. Na súa opinión “este plan excede as competencias da USC e da propia Facultade e debería ser consensuado co Goberno da Xunta de Galicia para que teña unha dotación económica suficiente”.

No ámbito específico da docencia das dúas titulacións de grao impartidas do centro, o novo decano considera que “a mellora da simulación como ferramenta esencial na aprendizaxe de competencias básicas e clínicas non pode esperar pola facultade nova”. Engade que “debe acometerse xa nesta fase coa adquisición de novos simuladores e cun uso eficiente dos recursos e espazos dispoñibles”.

Tamén dentro do programa, Julián Álvarez apunta o mantemento e potenciación da colaboración da Facultade de Medicina e Odontoloxía cos centros sanitarios do Sergas na docencia da práctica clínica, por considerala “fundamental para a formación dos futuros médicos e médicas”.

Álvarez Escudero
Ata a actualidade director do Departamento de Cirurxía e Especialidades Médico-Cirúrxicas, o catedrático Julián Álvarez Escudero é xefe do Servizo de Anestesioloxía, Reanimación e Tratamento da Dor do Complexo Hospistalario Universitario de Santiago, ademais de presidente da Sociedade Española de Anestesioloxía, Reanimación e Terapéutica da Dor así como da Comisión Nacional da Especialidade.