Saltar ao contido principal
Xornal

Times Higher Education sitúa a USC entre as 125 mellores universidades europeas pola súa dimensión docente

Actualizada: 12-07-2018 13:02
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

A Universidade de Santiago ocupa a posición 101-125 no ránking que dende o punto de vista da docencia acaba de presentar Times Higher Education (THE) especificamente para as universidades europeas. Na listaxe final incluíronse preto de 250 universidades de todo o continente. Este novo ránking docente súmase a clasificacións previas elaboradas por THE e que, na súa última edición situaba a USC no intervalo 601-800 das mellores universidades do mundo.

A nova clasificación é unha experiencia piloto baseada en boa medida nos resultados da enquisa realizada por THE entre máis de 30.000 estudantes universitarios, aos que se lles formularon preguntas sobre si a ensinanza recibidas apoia o pensamento crítico, se as clases os desafían ou sobre si teñen a oportunidade de interactuar co persoal docente, entre outras cuestións. Para a puntuación final tamén se toma en consideración a idoneidade dos medios utilizados polas universidades, as canles de relación coa comunidade universitaria, a capacidade para impartir docencia do xeito máis efectivo e a dispoñibilidade de contornas de ensino e aprendizaxe inclusivos. Ademais dos datos facilitados polas propias institucións e a mencionada enquisa, a clasificación tomou en consideración a enquisa de reputación académica elaborada por THE así como datos bibliométricos de Elsevier e de axencias estatísticas nacionais.

As universidades incluídas na listaxe final ofrecen cursos e programas conducentes a titulacións de ensino superior oficialmente recoñecidas, deben abordar máis dunha área de coñecemento e ter un mínimo de 5.000 estudantes matriculados no nivel de grao. Ademais, para ter en conta as valoracións, cada unha das institucións debían estar avaliadas por un mínimo de 50 respostas válidas na enquisa europea realizada entre o alumnado.