Saltar ao contido principal
Xornal

A EPS de Enxeñaría comeza a acreditación europea de tres títulos tras certificar a Acsug o seu sistema de garantía de calidade

Unha comisión visitará a próxima semana o centro universitario lugués para comezar a acreditación EUR-ACE®dos graos en Enxeñaría Forestal e Civil e do máster en Montes

Actualizada: 12-07-2018 14:20
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Vista da Escola Politécnica Superior de Enxeñaría da USC

A Escola Politécnica Superior de Enxeñaría do Campus Terra da USC comezará a próxima semana o proceso de acreditación europea EUR-ACE® para os seus títulos de grao en Enxeñaría Forestal e do Medio Natural e Enxeñaría Civil, así como do máster en Enxeñaría de Montes, segundo indicou o director do centro universitario lugués, Tomás Cuesta, quen engadiu que a comisión de avaliación externa encargada de acometer este proceso de acreditación internacional no eido das enxeñarías visitará o campus lugués a mediados da próxima semana.

 

Tomás Cuesta adiantou a inminente visita da comisión e acreditación EUR-ACE® á Escola Politécnica Superior de Enxeñaría logo de que a Axencia pola Calidade do Sistema Universitario de Galicia (Acsug) emitirá o informe favorable que certifica o óptimo nivel de funcionamento e de implantación do Sistema de Garantía de Calidade no centro universitario lugués, un recoñecemento que tamén acadaron na última convocatoria a Facultade de Ciencias do campus de Lugo, e as facultades de Psicoloxía e Bioloxía de Santiago. A tamén compostelá Escola Técnica Superior de Enxeñaría (ETSE) foi o primeiro centro da USC en conseguir esta acreditación da calidade do seu sistema e procesos de funcionamento.

 

O profesor Cuesta García salientou que a obtención do certificado de implantación do sistema de garantía de calidade expedido pola Acsug avala a calidade dos procesos que regulan o funcionamento da Escola Politécnica Superior de Enxeñaría da USC, un centro que na actualidade pode considerarse certificado a nivel nacional, xa que conta con todas as súas titulacións acreditadas ou en proceso de renovación da súa acreditación.

 

Neste mesmo senso, o director da EPS de Enxeñaría do Campus Terra da USC expresou a súa confianza en superar con éxito o proceso de acreditación europea EUR-ACE® que comezará a mediados da próxima semana para as titulacións de grao en Enxeñaría Forestal e do Medio Natural e Enxeñaría Civil, así como para o máster en Enxeñaría de Montes. A superación estes proceso de certificación de calidade no contexto europeo faría da Escola Politécnica Superior de Enxeñaría de Lugo o primeiro centro universitario da USC e tamén do Sistema Universitario Galego en contar coa acreditación EUR-ACE®.