Saltar ao contido principal
Xornal

Unha xornada técnica sobre a eficiencia das granxas de leite cita na EPS de Enxeñaría a máis 50 técnicos e profesionais do sector

Actualizada: 14-09-2018 14:12
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Público asistente ás xornadas sobre eficiencia das granxas de vacún de leite, na EPS de Enxeñaría de Lugo

A eficiencia das granxas de vacún de leite este venres no salón de actos da Escola Politécnica Superior de Enxeñaría do Campus Terra da USC, a temática das xornadas técnicas ‘Granxas de leite. Podemos ser máis eficientes?’, un foro organizado polo grupo de investigación Proxectos e Planificación (Proepla) da USC en colaboración coa Consellaría de Medio Rural da Xunta de Galicia.

 

O obxectivo destas xornadas é o da transferencia de coñecemento para así contribuír a mellorar o futuro do sector agrario galego e, nomeadamente, do sector leiteiro, segundo sinalou o catedrático da USC e coordinador do grupo Proepla, Manuel Francisco Marey, quen expresou a súa satisfacción pola participación neste foro de máis de medio centenar de técnicos e produtores do sector primario.

 

O programa das xornadas comezou cun acto inaugural no que a adxunta á Vicerreitoría de Coordinación do campus de Lugo para Investigación, Transferencia e Innovación, Elvira López Mosquera, o Xefe do Servizo de montes da Consellería do Medio Rural en Lugo, Xabier Bruña; o director da EPS de Enxeñaría de Lugo, Tomás Cuesta, e o catedrático da USC e coordinador do Proepla, Manuel Francisco Marey, deron a benvida a todo o público participante.

 

O profesor da Universidade de Córdoba Paco Maroto abrirá quenda de relatorios cunha intervención que se desenvolverá baixo o título ‘Tecnoloxías de precisión en vacún de leite’, que poderá seguirse a través de videoconferencia. De seguido, Juan Caínzos, de Elanco, tratará na súa exposición a saúde animal como fonte de beneficios para o gandeiro.

 

A optimización do aproveitamento dos forraxes para gando e as novas tecnoloxías de precisión dispoñibles será o tema do que falará Raquel Cortesao, de Pionner. Henrique Prado, de Alltech, pechará a quenda de intervencións matinais cunha exposición sobre eficiencia e saúde dos ruminantes.

 

Xa en quenda de tarde, as xornadas sobre eficiencia nas granxas de leite, un foro no que o grupo empresarial Aresa tamén presentou unha nova liña de fertilizantes, continuaron cun relatorio sobre mellora da eficiencia proteica a través da alimentación, a cargo de Javier López, de Kemin. De seguido, o asesor veterinario Ángel Ávila falará sobre a sustentabilidade na formulación de dietas de vacas leiteiras. Un coloquio aberto ao debate e á presentación de propostas e suxestións, guiado polo Xefe do Servizo de montes da Consellería do Medio Rural en Lugo, Xabier Bruña, serviu de colofón da xornada.


Outras imaxes


De esquerda a dereita, Cuesta, López, Bruña e Marey, na apertura das xornadas