Saltar ao contido principal
Xornal

O terceiro Foro da Rede Galega de Investigación en Demencias celebrarase a vindeira semana en Psicoloxía

É unha actividade de balde na que as persoas interesadas deberán inscribirse antes do día 26

Actualizada: 20-09-2018 10:14
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

O 3º Foro da Rede Galega de Investigación en Demencias celebrarase na Facultade de Psicoloxía o día 27 coa participación da profesora Sylvie Belleville, da Universidade de Montreal, e do profesor Simon Duchesne, da Universidade Laval, ambos de Canadá. As conferencias serán en inglés e e a entrada de balde, previa inscrición no correo electrónico arturoxose.pereiro@usc.es antes das 13.00 horas do 26 de setembro.

No transcurso deste Foro, a profesora Belleville falará sobre o papel do adestramento cognitivo para fomentar a saúde cognitiva e cerebral en persoas en risco de demencia, mentres que Simon Duchesne pronunciará o relatorio ‘Consorcio de Quebec para a identificación temperá da enfermidade de Alzheimer: neuroimaxe e biomarcadores’.

A Rede Galega de Investigación en Demencias (REGIDEM) é “un esforzo de investigación colaborativa e multidisciplinar nun tema de inmensa repercusión científica, clínica e social, como son as demencias”. Nela conflúen “actores do ámbito da investigación básica, clínica e grupos sociais e o apoio da Consellaría de Política Social”. REGIDEM aspira a ser a primeira rede dedicada ás demencias onde se xuntan “todos os sectores implicados, dende os grupos de investigación das tres universidades, institutos de investigación sanitaria, hospitais, ata as asociacións de enfermos e familiares de enfermos e o sector privado, atención xerontolóxica e xeriátrica.