Saltar ao contido principal
Xornal

A Rede MetalBIO procura novas vías de financiamento para avanzar no estudo e no desenvolvemento de fármacos

A Rede de Ións Metálicos en Medios Biolóxicos, coordinada por Marcelino Maneiro, agarda mobilizar oito millóns de euros para actividades de I+D+i no trienio 2017-2019

Actualizada: 05-11-2018 13:58 . INVESTIGACIÓN
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Participantes na última reunión de traballo que vén de celebrar a Rede MetalBIO no Grove

A Rede de Ións Metálicos en Medios Biolóxicos (MetalBIO), coordinada polo profesor do Departamento de Química Inorgánica da USC na Facultade de Ciencias do campus de Lugo e que agroma aos grupos galegos que estudan o papel dos ións metálicos en medios biolóxicos, traballa na procura de novas vías de financiamento para avanzar así no estudo e posible desenvolvemento de  novos fármacos.

 

A rede MetalBIO definiu a súas futuras liñas de actuación na reunión anual que vén de celebrar a finais do mes e outubro. Nesta xuntanza de traballo celebrada no Grove participaron máis de corenta investigadores de dez universidades, xestores de proxectos europeos de diferentes entidades como Feuga ou o Hospital Nacional de Parapléxicos (Toledo), así como representantes de empresas de ámbito biotecnolóxico como AMSbiopharma ou Laboratorio Cifga.

 

Os ámbitos sanitario e da saúde constitúen dúas das áreas nos que teñen ou poden ter especial incidencia as achegas e os proxectos científicos desenvolvidos polos integrantes de MetalBIO. De feito, os modelos metálicos funcionais que preparan algúns dos grupos adheridos á esta rede teñen potencial aplicabilidade como fármacos antitumorais ou como principios antioxidantes. Neste mesmo ámbito de estudo, outros grupos tamén investigan novos sistemas metalosupramoleculares para a liberación de medicamentos ou en complexos de renio como modelos de fármacos para radioimaxe.

 

A actividade investigadora de MetalBIO, unha rede composta por oito grupos de investigación da USC, UDC e UVigo e que conta con financiamento da Secretaría Xeral de Universidades da Xunta de Galicia, inclúe tamén a activación de moléculas de auga para a produción de hidróxeno ou a fixación de dióxido de carbono a través de complexos metálicos.

 

MetalBIO é constitúe asemade unha rede de investigación de marcada pegada luguesa, tal e como o proba o feito de que tres dos grupos asociados teñen a súa sede de traballo nalgunha das facultades ou centros universitarios que conforman o Campus Terra da USC: o grupo Bioquímica-Lugo e o grupo Farmatox, na Facultade de Veterinaria, e o grupo SupraBioin, na Facultade de Ciencias. Este centro universitario do campus lugués atópase tamén no xerme desta rede, xa que acolleu xa en 2014 a primeira xuntanza de MetalBIO, un primeiro encontro ao que logo seguiron outras reunións en Cuntis, Cádiz, Bilbao e Ourense.

 

As accións de colaboración e traballo en conxunto desenvolvidas nestes anos polos integrantes da rede MetalBIO están a dar xa os seus froitos. De feito, os grupos que compoñen a rede publican unha media de 60 artigos JCR/ano. No capítulo do financiamento, MetalBIO conseguiu mobilizar catro millóns de euros en recursos para investigación no trieno 2014-2016, unha contía que representa o cuádruple respecto do millón de euros xestionado no trieno 2011-2013. Para o trieno 2017-2019 a rede MetalBIO agarda poder incrementar esta cantidade ata os oito millóns de euros, fundamentalmente a través da achega de proxectos e redes europeas, segundo indicou Marcelino Maneiro.

 

Maneiro adiantou asemade que a Rede de Ións Metálicos en Medios Biolóxicos está a participar na organización de dous eventos relevantes, tal e como o son o Solar Fuel Production Workshop, unha actividade promovida en colaboración co International Iberian Nanotechnology Laboratory e que se desenvolverá os días do 29 ao 30 deste mes, e a XI Reunión Científica de Bioinorgánica BioLugo2019, que se celebrará do 30 de xuño ao 3 de xullo de 2019.