Saltar ao contido principal
Xornal

Os Coloquios internacionais en Compostela analizan a evolución histórica da peregrinación académica nos últimos sete séculos

Actualizada: 07-11-2018 10:28
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Os XIII Coloquios en Compostela celebraranse este xoves 8 e o venres 9 co lema ‘De la peregrinato academica ao programa Erasmus (XIV-XXI)’, organizados pola Cátedra Unesco 226 sobre Migracións e dedicado á memoria de Antonio Eiras Roel. No Paraninfo da Universidade, na Facultade de Xeografía e Historia, a sesión inaugural do encontro celebrarase este xoves ás 19.00 horas e continuará coa conferencia que impartirá Luis E. Rodríguez-San Pedro Bezares, da Universidade de Salamanca, titulada ‘Mobilidade estudantil e vítores de nacións na Monarquía Hispánica. A Salamanca clásica, século XVI-XVIII’.

O programa do venres 9 trasladarase ao Salón e Actos da Facultade de Filosofía, onde André de Oliveira Leitão, do Centro de História da Universidade de Lisboa, iniciará a xornada referíndose a partir das 9.30 horas sobre as rutas de peregrinato academica dos universitarios portugueses na Idade Media, entre os séculos XII e XV. Seguiranlle Fernando Taveira da Fonseca, da Universidade de Coimbra, co relatorio ‘Coimbra, unha universidade para o Imperio (XII-XIX)’ e Rafael Ramis Barceló, da Universitat de les Illes Balears, con ‘A peregrinato academica e a mobilidade estudantil na Coroa de Aragón (XV-XVIII).

A partir das 16.00 horas Pegerto Saavedra Fernández, da USC, reiniciará a xornada referíndose á mobilidade estudantil en Galicia entre 1750 e 1850, mentres que Enrique López Veloso, do Servizo de Relacións Exteriores da USC, aludirá á evolución da mobilidade internacional na USC entre finais do XX e as primeiras décadas do XXI. A quenda de intervencións rematará coa presenza de Daniel Malet Calvo, do Centro de Investigación e Estudos de Socioloxía do Instituto Universitário de Lisboa, falando de ‘Globalización e mobilidade estudantil nas cidades europeas: o caso do programa Erasmus’.