Saltar ao contido principal
Xornal

O ciclo Luis Asorey aborda este ano a problemática dos incendios forestais e a recuperación de terreos queimados en Galicia

O director Xeral de Ordenación Forestal da Xunta de Galicia, Tomás Fernández-Couto, abrirá o luns 19 este programa de relatorios na Deputación Provincial de Lugo

Actualizada: 13-11-2018 11:53
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Cartaz do ciclo de conferencias Dr. Luis Asorey García de 2018

O ciclo de conferencias Dr. Luis Asorey García, un programa de divulgación científica promovido pola Real Academia Galega de Ciencias en colaboración coa USC e a Deputación Provincial de Lugo, abordará na súa edición deste ano 2018 a problemática dos incendios forestais e a recuperación de terreos queimados en Galicia.

 

O director Xeral de Ordenación Forestal da Xunta de Galicia, Tomás Fernández-Couto, abrirá o luns 19 este programa de relatorios no salón de actos da Deputación Provincial de Lugo cunha intervención que se desenvolverá, a partir das 19.30 horas, baixo o título ‘Os incendios forestais en Galicia’.

 

O ciclo terá continuidade os días 20, 21, 22, 26, 27 e 28 de novembro, datas nas que están programadas outros seis relatorios sobre esta temática na Deputación de Lugo, agás a conferencia que impartirá a profesora da USC Ana Daría Ruiz González o martes 20 de novembro, a partir das 19.30 horas, no salón de actos da EPS de Enxeñaría do campus de Lugo, e na que tratará sobre o combustible vexetal e os incendios forestais.

 

As medidas lexislativas, policiais e xudiciais centrará o 20 de novembro a intervención do fiscal de Medio Ambiente de Galicia, Álvaro García Ortiz. Ao día seguinte, o profesor do Departamento de Xeografía da USC Alberto Martí Expeleta falará, tamén a partir das 19.30 horas, no mesmo escenario da Deputación de Lugo sobre a relación entre cambio climático e incendios forestais.

 

A recuperación de terreos queimados é o título da conferencia que impartirá o luns 26 o enxeñeiros de Montes e ex director do Centro de Investigación Forestal de Lourizán, José Antonio Vega Hidalgo, mentres que ao día seguinte a profesora da USC Elvira Díaz Vizcaíno afondará na súa intervención sobre os efectos ecolóxicos dos incendios forestais.

 

O ciclo de conferencias Luis Asorey García de 2018 chegará ao seu colofón o 28 de novembro na Deputación de Lugo cun relatorio, a partir das 19.30 horas, a cargo do catedrático da USC e membro da Real Academia Galega de Ciencias Antonio Rigueiro Rodríguez, que ofrecerá un relatorio co título ‘Os sistemas silvopastorais como técnica de prevención de incendios’.

 

Inscrición e prazos

O proceso de inscrición para participar no ciclo de conferencias Luis Asorey García, un programa recoñecido pola Consellería de Educación e Ordenación Universitaria como actividade de formación do profesorado non universitario, é gratuíto para todo o público. O prazo permanece aberto ata o xoves día 15 de novembro e as persoas interesadas poden formalizar a súa matrícula este programa de divulgación científica de xeito telemático na web da Real Academia Galega de Ciencias, na que poderán ben cumprimentar o formulario habilitado ou ben imprimilo e entregalo no Rexistro da Deputación de Lugo.