Saltar ao contido principal
Xornal

A segunda Reunión de Xerentes da Alianza de centros e unidades de excelencia Severo Ochoa e María de Maeztu celébrase este venres no CEA

Actualizada: 22-11-2018 13:30
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

A segunda Reunión de xerentes da Alianza de centros e unidades de excelencia Severo Ochoa e María de Maeztu (SOMMa) celebrarase este venres 23 no Centro de Estudos Avanzados (CEA) organizada polo Instituto Galego de Física de Altas Enerxías (IGFAE). O reitor da USC, Antonio López, dará a benvida aos participantes nun acto ás 9.00 horas no CEA (Finca de Vista Alegre) no que tamén participará o secretario xeral de Universidades da Xunta de Galicia, José Alberto Díez de Castro.

A xuntanza permitirá tratar a situación actual deste centros e unidades de excelencia en relación a temas de gran importancia para o seu funcionamento como son o calendario de convocatoria ou os procesos de contratación pública e de persoal. En Compostela daranse cita representantes de cinco unidades de Excelencia María de Maeztu e quince centros de excelencia Severo Ochoa. Ademais, uniranse por videoconferencia outras tres unidades e dous centros máis.

SOMMa é unha agrupación constituída en outubro de 2017 co apoio da Secretaria de Estado de Investigación, Desenvolvemento e Innovación que pretende impulsar a visibilidade nacional e internacional da investigación española como un ecosistema de excelencia interdisciplinar e interconectado. Actualmente existen en España 25 destes centros ou unidades, cubrindo todas as áreas de investigación, emprazados en Cataliña, Madrid, País Vasco, Comunidade Valenciana, Andalucía, Canarias e Galicia. A súa misión é promover, reforzar e maximizar a nivel internacional tanto o valor da ciencia de excelencia producida neste centros, como o seu impacto económico e social.