Saltar ao contido principal
Xornal

DivulgaTerra pecha a súa terceira edición cun relatorio de Ana Goy sobre o Pórtico da Gloria trala restauración

A derradeira sesión dará comezo este xoves, a partir das 19.00 horas, na Casa do Saber de Lugo e estará dedicada ás Artes, Humanidades e Ciencias Sociais

Actualizada: 28-11-2018 08:39
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Cartaz da xornada

A terceira edición de DivulgaTerra, o evento que pretende divulgar entre a cidadanía o traballo dos investigadores e investigadoras do Campus Terra da USC empregando a lingua galega, chega á súa derradeira xornada cunha sesión dedicada ás Artes, Humanidades e Ciencias Sociais, que terá como colofón un relatorio da profesora da USC Ana Goy sobre o Pórtico da Gloria trala restauración e que terá lugar este xoves 29 de novembro, ás 19.00 horas, na Casa do Saber de Lugo

 

Ademais de Goy, en quendas de dez minutos de duración, intervirán Marcos Gerardo Calles Lombao, quen afondará na catedral de Lugo no século XIX; Daniel Manuel Vázquez Vila, quen reflexionará sobre a situación dos migrantes na actualidade; ou Diego Camelo Moreira, quen analizará os sistemas de información territorial en diferentes contextos.

 

Acto seguido, Tamara González López falará sobre o impacto e vías de introdución de novos nomes no sur lucense; Geusa da Purificação Pereira, profundará nos cambios climáticos en Brasil e o seu impacto nos agricultores; e de novo Tamara González López, intervirá para falar, nesta ocasión, do proceso contra o escritor Manuel María.

 

Lucía Casal de la Fuente, xa na quenda final, disertará sobre educación vocal e Ignacio García González pronunciará o relatorio ‘A historia escrita nos aneis das árbores’. Deste xeito, DivulgaTerra pon o punto final á celebración do mes da ciencia en galego no que, a través de tres sesións temáticas, deuse a coñecer ante un público non especializado as liñas de investigación da USC no Campus Terra.

 

O xoves 15 de novembro celebrouse a sesión dedicada ás Ciencias da Saúde cun relatorio de Mercedes Novo sobre o alzhéimer e o xoves 22, Rosa Mosquera, na sesión dedicada ás Ciencias e á Tecnoloxía, afondou no papel do pastoreo no monte na prevención de incendios. En total, no DivulgaTerra deste ano participaron un total de vinte e tres investigadores e investigadoras da USC no seu Campus Terra.