Saltar ao contido principal
Xornal

Os dereitos humanos en Nicaragua, tema dunha xornada organizada para este mércores por alumnado de Educación Social

Actualizada: 11-12-2018 10:46
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Cartel do encontro

Como parte dun proxecto de Aprendizaxe-Servizo xunto con Solidariedade Internacional de Galicia, alumnado do 3º curso do Grao en Educación Social da USC organiza para este mércores 12 unha actividade que aborda a loita polos dereitos humanos en Nicaragua.

Nicaragua vive unha preocupante crise sociopolítica e de dereitos humanos, agudizada a partir dos acontecementos desencadeados o pasado 18 de abril de 2018 cando se organizaron protestas masivas en todo o país que foron enfrontadas polo goberno mediante o despregamento das forzas de seguridade, que deixaron centos de vítimas.

Para coñecer en profundidade a situación actual do país, está prevista para este mércores 12 ás 12.00 horas no Salón de actos da Facultade de Ciencias da Educación (Campus Vida) un encontro cunha recoñecida activista e feminista nicaraguana cunha grande traxectoria na defensa dos dereitos humanos. O seu labor remóntase a tres décadas de traballo no campo da xustiza social, a defensa do pobo nicaraguano e a reivindicación do papel da muller.