Saltar ao contido principal
Xornal

A membrana de grafeno sintetizada na USC ‘Holey graphene’, elixida ‘Molécula do ano'

Os lectores da revista C&EN, da American Chemical Society elixiron a malla de grafeno con poros controlados a escala atómica como a mellor molécula de 2018

Actualizada: 17-12-2018 12:25
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Imaxe da nova membrana de grafeno con detalle da distribución dos seus poros, obtida mediante a técnica de Microscopía de Efecto Túnel. Foto: ICN2

A membrana de grafeno poroso sintetizada por investigadores do Centro Singular de Investigación en Química Biolóxica e Materiais Moleculares da USC (CiQUS), o Institut Català de Nanociència i Nanotecnologia (ICN2) e o Donostia International Physics Center (DIPC) foi elixida como a molécula máis salientable do ano polos lectores da revista C&EN, da American Chemical Society, cun 58% dos votos de entre oito candidatas internacionais.

A revista Science publicaba en abril este fito, nun traballo dirixido polo investigador da USC Diego Peña e o líder de grupo do ICN2 ICREA Aitor Mugarza que expoñía o potencial deste prezado material en aplicacións como a electrónica, filtros e sensores. Os resultados deste estudo, cuxo primeiro autor é o doutor César Moreno (ICN2) a partir da molécula sintetizada no CiQUS por Manuel Vilas Varela, deu lugar á solicitude dunha patente.

A presenza de poros no grafeno, cuxo tamaño, forma e densidade son modificables na nanoescala con precisión atómica, pode modificar a súa estrutura básica e utilizarse como unha malla ou filtro permeable para substancias minúsculas como gases de efecto invernadoiro, sales ou biomoléculas. Ademais, o grafeno convértese nun semiconductor cando o espazo entre poros redúcese a uns poucos átomos, abrindo a porta ao seu uso en dispositivos electrónicos, onde substituiría os compoñentes baseados en silicio máis voluminosos e ríxidos que se usan hoxe en día.

O grafeno resultante, útil coma baruto molecular e con propiedades eléctricas parecidas ás do silicio, permitirá no futuro desenvolver dispositivos que actúen simultaneamente como filtro e sensor, posibilitando a separación de moléculas específicas e bloquear e/ou monitorizar o paso das mesmas polos nanoporos, usando un campo eléctrico.