Saltar ao contido principal
Xornal

Un curso forma en Humanidades a 15 investigadores do campus lugués en técnicas e recursos para publicar en revistas de impacto

Profesores das universidades de Valladolid e Salamanca imparten este programa sobre publicacións científicas promovido polo Ciedus da USC co apoio da Fundación Ultreia

Actualizada: 17-12-2018 12:26
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Investigadores participantes no curso sobre publicacións científicas en revistas de impacto no eido das Humanidades e das Ciencias Sociais

As estratexias, técnicas e recursos para a publicación en revistas de impacto centra a temática do curso sobre publicacións de carácter científico que comezou a desenvolverse este luns e continuará mañá na Facultade de Humanidades do campus de Lugo. Esta actividade formativa, na que participan 15 estudantes e investigadores predoutorais na sede universitaria luguesa, está promovida polas vicerreitorías de Planificación, Titulacións e de Coordinación do campus de Lugo e coordinada pola Escola de Doutoramento Internacional en Artes e Humanidades, Ciencias Sociais e Xurídicas do Ciedus da USC.

 

Os docentes responsables de impartir este curso orientado a optimizar o potencial dos investigadores do campus de Lugo e tamén a mellorar o alcance e o impacto das súas respectivas achegas no eido da I+D+i son Benito Arias Martínez, catedrático da Universidade de Valladolid, e Víctor Arias González, profesor da Universidade de Salamanca.

 

Este módulo formativo sobre publicacións de carácter científico no ámbito das humanidades e ciencia sociais está coordinado polo profesor da USC Ramón López Facal e recibe financiamento da Fundación Ultreia. Trátase dun programa de carácter presencial que está estruturado en 12 horas lectivas, que se impartirán este luns e martes na Facultade de Humanidades de Lugo en quenda de mañá e tarde

 

O curso, a través do que o goberno da USC pretende achegar ferramentas complementarias aos investigadores en formación, busca ademais de mellorar o impacto científico das súas respectivas publicacións académicas, potenciar tamén as  súas competencias en comunicación académica.

 

O programa destas dúas xornadas de formación é amplo e abrangue cuestións que van desde os factores de impacto e de clasificación das revistas JCR e Scopus, a análise das características e procedementos das publicacións de impacto en Ciencias Sociais e Humanidades, aspectos formais referidos ás regras de edición, sistema de citas e orde dos autores dun equipo nunha publicación ata o cometido que desenvolven os editores e revisores no proceso de avaliación por pares.

 

Os docentes encargados de impartir este curso aproveitarán as clases programadas para afondar co alumnado nalgunhas ferramentas informáticas acaídas para recoller e procesar datos en investigación en Ciencias Sociais, ademais de para analizar e debater sobre fortalezas e fraquezas dos artigos de calidade, así como das revisións maiores e menores dos avaliadores ou mesmo da clasificación e elección das publicacións de impacto científico máis axeitadas en función do contido de cada artigo.

 

A organización deste curso sobre estratexias, técnicas e recursos para publicar en revistas científicas de impacto no ámbito das Ciencias Sociais e Humanidades, súmase á xornada formativa centrada nas publicacións en revistas de impacto no eido das ciencias da saúde e das enxeñeiras, un curso organizado a comezos deste mes na Facultade de Veterinaria de Lugo pola Escola de Doutoramento Internacional do Campus Terra co financiamento tamén da Fundación Ultreia e impartido na Facultade de Veterinaria polo editor do grupo Nature e investigador ‘Ramón y Cajal’ na Universidade de Girona Marc Yeste. Con estes dous seminarios, a USC trata de achegar as mesmas ferramentas e recursos formativos a toda a mocidade investigadora do campus de Lugo, independentemente das súas liñas de traballo.