Saltar ao contido principal
Xornal

Bioloxía, unha das sedes da fase galega da décima edición da Olimpíada de Xeoloxía

Actualizada: 12-02-2019 09:34
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Foto de grupo dos participantes na edición pasada no Campus de Lugo

A Facultade de Bioloxía da USC e o Concello de Viveiro serán dúas das sedes que, xunto coa Escola de Minas en Vigo e a Facultade de Ciencias de Ourense, acollan este mércores 13 as probas correspondentes á fase galega da X olimpíada de Xeoloxía. Nesta décima edición participarán un total de 330 estudantes de Secundaria e Bacharelato de toda Galicia –115 en Santiago–, o que supón un notable ascenso respecto a anos anteriores.

A olimpíada de Xeoloxía pretende fomentar o interese polos contidos propios da Xeoloxía e do conxunto das Ciencias da Terra, animar ao alumnado participante a comezar estudos universitarios relacionados coa Xeoloxía e destacar a importancia da preservación do medio natural.

Como en anos anteriores, na presente edición colaboran activamente na Universidade de Santiago, ademais de Bioloxía, o delegado do Reitor para o Ensino Medio e o Departamento de Edafoloxía e Química Agrícola. Serán precisamente estes responsables universitarios quen dean a benvida ás 11:00 horas aos máis dun cento de rapaces e rapazas que competirán en Santiago e que tamén entregarán ás 17.30 horas os premios aos gañadores e gañadoras.

A fase española, convocada un ano máis polo Colegio de Geólogos, a Sociedad Geológica Española e a AEPECT (Asociación Española para la Enseñanza de las Ciencias de la Tierra), terá lugar o 6 de abril en Cáceres e a ela poderán concorrer as persoas que gañen cada fase territorial.  De aí sairá a selección que competirá no certame internacional a finais de agosto en Daegu (Corea do Sur).