Saltar ao contido principal
Xornal

Un comité de especialistas de primeiro nivel internacional avalía o labor do Instituto Galego de Física de Altas Enerxías

O Instituto na USC recibiu a visita do seu Comité Científico Asesor

Actualizada: 08-03-2019 14:51
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Membros do IGFAE, xunto cos membros do comité científo e autoridades da USC e da Xunta. Foto: Alfonso Ponte

O Comité Científico Asesor do Instituto Galego de Física de Altas Enerxías (IGFAE), composto por cinco membros externos ao centro, avaliaron este xoves e o venres a estratexia científica e a calidade da investigación que se realiza neste centro emprazado na USC e recoñecido como a única Unidade de Excelencia María de Maeztu acreditada en Galicia. Estas avaliacións externas constitúen a pedra angular sobre a que se constrúe o modelo de funcionamento do IGFAE, instituto mixto da Universidade de Santiago de Compostela e a Xunta de Galicia. As recomendacións do comité serán incluídas na definición estratéxica e nas prioridades para os próximos anos.

Con experiencia na dirección dalgún dos máis importantes centros de investigación do mundo, a comitiva estivo formada por Sergio Bertolucci (director científico e de computación do CERN entre 2009 e 2015), Paolo Giubellino (director das infraestruturas GSI e FAIR en Darmstadt), Gabriela González (voceira do experimento LIGO entre 2011 e 2017, incluíndo o momento do descubrimento das ondas gravitacionais), Franzis Halzen (iniciador das colaboracións científicas AMANDA e IceCube no Polo Sur) e Larry McLerran (director do Institute for Nuclear Theory the Seattle).

O programa de avaliación desenvolvido nestas dúas xornadas incluíu reunións con todo o persoal investigador implicado en cada un dos oito programas de investigación que se desenvolven no IGFAE, organizados en tres áreas estratéxicas: O Modelo Estándar ata os límites, Partículas cósmicas e física fundamental e Física nuclear, dende o laboratorio ata a mellora da saúde das persoas, para avaliar a adecuación á planificación estratéxica da Unidade, a calidade da investigación realizada e a identificación de oportunidades de reorientación, potenciación, apertura ou peche de cada actividade da investigación.

O Comité visitou tamén os espazos que ocupa o IGFAE nos distintos bloques da Facultade de Física e o Laboratorio Láser de Aceleración e Aplicacións (L2A2) da USC para avaliar a adecuación dos recursos dispoñibles aos seus obxectivos. A visita rematou cunha reunión e almorzo dos membros do comité con representantes da USC e a Xunta de Goberno, incluíndo á conselleira de Educación, Universidades e Formación, Carmen Pomar; o reitor da USC, Antonio López; o vicerreitor de Investigación, Vicente Pérez Muñuzuri; e o secretario Xeral de Universidades, José Alberto Díez de Castro, entre outros/as.