Saltar ao contido principal
Xornal

A aceleradora do sector alimentario Business Factory Food, na que participa a USC, presenta a súa oferta en Lugo e Santiago

A sesión pública programada no campus de Lugo desenvolverase o 27 de marzo no edificio Cactus e replicarase no Cibus de Compostela o vindeiro 8 de abril

Actualizada: 26-03-2019 09:11
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Imaxe corporativa da aceleradora vertical alimentaria Business Factory Food

A aceleradora vertical especializada no sector alimentario Business Factory Food (BFF), unha iniciativa promovida pola Xunta de Galicia a través do Instituto Galego de Promoción Económica (Igape), a Sociedade Xestora de Entidades de Investimento de Tipo Pechado (Xesgalicia) e da Axencia Galega de Innovación (GAIN), na que participa a USC xunto coas demais universidades galegas, entre outras entidades e empresas, presentará o mércores 27 de marzo, a partir das 12.00 horas, a súa oferta no edificio Cactus do campus de Lugo da USC. Esta sesión terá réplica o vindeiro 8 de abril na sede universitaria compostelá, cun acto que se desenvolverá a partir das 11.45 horas, no edifico Cibus de Santiago.

 

As xornadas de presentación da primeira edición da Business Factory Food están pensadas como sesións abertas a toda a cidadanía, aínda que as persoas que teñan interese en participar en calquera destas sesións, tanto na programada no campus de Lugo como no de Compostela, deben formalizar a súa inscrición en liña con antelación.

 

A BFF é unha aceleradora que busca solucionar retos do sector alimentario e da industria 4.0, a través de empresas en vías de constitución ou recentemente constituídas, ofrecendo para iso financiamento, infraestruturas, mentorización, coaching e formación. Para acadar este obxectivo, a BFF conta coa dinamización, xestión e coordinación do Clúster Alimentario de Galicia (Clusaga) e co apoio de grandes empresas tractoras do sector, como Grupo Calvo, Grupo Nova Pescanova, Adegas Martín Códax, Kiwi Atlántico, Cravo Food Factory, CLUN Cooperativas Lácteas Unidas, Quescrem e Torre de Núñez.

 

Esta nova iniciativa conta tamén cun elevado nivel de representatividade, xa que ademais das tres universidades galegas, tamén participan da Business Factory Food a Asociación Galega de Cooperativas Agrarias (Agaca), Anfaco-Cecopesca, o Instituto Tecnolóxico de Galicia (ITG) e a Fundación Empresa-Universidade Galega (Feuga). Todos os socios da BFF achegan coñecemento experto, infraestruturas e medios técnicos a disposición dos emprendedores para o desenvolvemento e avance dos seus proxectos.

 

Actos de presentación en Lugo e Santiago

A vicerreitora de Coordinación do campus de Lugo, Montserrat Valcárcel, presidirá o acto de presentación da BFF no edificio Cactus de Lugo, mentres que o director da Área de Valorización, Transferencia e Emprendemento da USC, José Luis Villaverde Acuña, fará o propio na sesión programada no Cibus de Santiago. O xerente da Business Factory Food, Javier Álvarez Osuna, e Juan Feijoo Casanova, da Área de Competitividade-Igape, tamén participarán nos dous actos.