Saltar ao contido principal
Xornal

A segunda edición do Seminario Permanente de Comunicación e Xénero CO(M)XÉNERO analizará as ‘Mulleres nas estremas’

Actualizada: 25-03-2019 11:38
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Cartel do encontro

A segunda edición de CO(M)XÉNERO, Seminario Permanente de Comunicación e Xénero, celebrarase este martes 26 de marzo na Facultade de Ciencias da Comunicación da USC organizado polo Grupo de Estudos Audiovisuais (GEA). O encontro busca ser un foco permanente de discusión e formación sobre o papel dos medios na vertebración da sociedade, con especial atención á visibilización informativa e cinematográfica da identidade de xénero. Está dirixido a profesionais, estudantes de comunicación e a todas as persoas interesadas en adquirir ferramentas que lle axuden a abordar unha lectura crítica dos medios. A inscrición é de balde e estará aberta ata este luns 25 a través do formulario dispoñible na web do grupo.

O programa do encontro comezará ás 16.30 horas coa presentación do programa e cargo da coordinadora do encontro, a directora de GEA e catedrática Margarita Ledo Andión, e da docente e investigadora da USC Marta Pérez Pereiro. A segunda edición de CO(M)XÉNERO desenvolverase co lema ‘ Muller nas Estremas’ para explorar as fronteiras físicas, imaxinarias e culturais vencelladas ao xénero dende o punto de vista do cinema como medio para encaralas. No seu desenvolvemento contará coa presenza de dúas investigadoras especializadas no tratamento da muller e o feminino na contorna cinematográfica: Ana Catarina Pereira, docente da Universidade da Beira Interior (Covilhã, Portugal) e Elena Oroz, profesora da Universidade Carlos III e do Centro Universitario TAI.

Nesta edición, o Seminario Permanente de Comunicación e Xénero colabora coa Mostra Internacional de Cinema Etnográfico (MICE). Ademais, como explican as organizadores do evento, serve de complemento teórico e formativo a unha Carta Branca que, baixo o mesmo título de ‘Muller nas Estremas’, programa unha serie de proxeccións sobre a figura da muller como viaxeira, como migrante, como exiliada, con filmes que exploran as fronteiras como lindes á súa mobilidade física e simbólica. As sesións da Carta Blanca, programadas do 26 ao 28 de marzo en diferentes espazos de Compostela, abeiran pezas de estilos e estratexias nas que se entrecruzan o experimental, o ensaístico e o observacional a través das creacións de Ursula Biemann, Keina Espiñeira, Bouchra Khalili, Xosela Franco e Anxela Caramés.

No encontro tamén colaboran a Xunta de Galicia, a Oficina de Igualdade de Xénero da USC e a Asociación Xornalistas Galegas.