Saltar ao contido principal
Xornal

A marteiliosis do berberecho e a neoplasia diseminada centran o primeiro ‘Xantar Biocientífico’ de BioReDes

O investigador do Centro de Investigacións Mariñas Antonio Villalba tratou este venres no campus de Lugo dous problemas sanitarios que afectan ao berberecho en Galicia

Actualizada: 05-04-2019 14:01
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Participantes no primeiro Xantar Biocientífico organizado por BioReDes no edifico Cactus do campus de Lugo

A investigación ao redor de dous problemas sanitarios no berberecho en Galicia de gran impacto socioeconómico e científico centrou este venres no edificio Cactus do campus do campus de Lugo a primeira sesión dos ‘Xantares Biocientíficos’, un programa de debate e intercambio de coñecemento promovido pola agrupación estratéxica de investigación do Campus Terra da USC para Xestión e Produción Sostible de Bio-recursos (BioReDes) pretende dar visibilidade a cuestións científicas de especial interese polo seu impacto social, económico e ambiental, así como polo seu nivel de innovación.

 

A primeira parte da charla centrouse na marteiliosis, unha enfermidade parasitaria causante dunha elevada mortalidad no berberecho e é a principal causante da redución drástica da poboación de berberecho na ría de Arousa, un dos bancos máis produtivos de Galicia deste bivalvo.

 

A outra enfermidade que presentou o coordinador da área de Patoloxía do Centro de Investigacións Mariñas da Consellería do Mar da Xunta de Galicia, Antonio Villaba, e que suscitou un gran debate foi a neoplasia diseminada, un tipo de cancro que lembra a leucemia e afecta a diferentes especies de moluscos, incluídos os berberechos. Este tipo de cancro se caracteriza pola transmisión entre diferentes especies de células cancerosas liberadas á auga por individuos enfermos e que logo se introducen e proliferan en individuos sans.

 

Divulgación científica

O programa ‘Xantares Biocientíficos’ está concibido como un seminario de divulgación científica de periodicidade mensual. A nova iniciativa de BioReDes presenta unha estrutura dinámica e divulgativa, dado que aspira a converterse dun foro aberto e accesible a investigadores non especialistas na temática. Daquela, as sesións programadas no marco deste ciclo e que se desenvolverán o primeiro ou o segundo venres de cada mes, comezarán cun relatorio curto, cunha duración aproximada de 30 minutos, a cargo dun investigador convidado o de calquera membro da agrupación, tralo que se abrirá un debate. O obxecto último desta actividade,  non é outro que o de construír un espazo informal de análise e intercambio de ideas e coñecementos que sirva de alicerce para futuras colaboracións.


Outras imaxes


Antonio Villaba, na súa intervención no campus de Lugo