Saltar ao contido principal
Xornal

A USC achega a escolares as claves do urbanismo sustentable e o valor dos recursos naturais no marco do Life Lugo+Biodinámico

Profesores e investigadores da EPS de Enxeñaría desenvolveron acción formativas e de divulgación medioambiental en colexios de Lugo nas que participaron 750 escolares

Actualizada: 12-04-2019 14:22
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Accións de sensibilización desenvolvidas en centros educativos de Lugo ao abeiro do LIFE Lugo+Biodinámico

Profesores e investigadores da Escola Politécnica Superior de Enxeñaría do campus de Lugo da USC formaron e informaron a escolares de diversos centros educativos da capital luguesa sobre as claves do urbanismo sustentable e do valor que agochan os recursos naturais existentes na contorna no marco do proxecto europeo LIFE Lugo+Biodinámico.

 

O labor de sensibilización e concienciación respecto da importancia da conservación medioambiental da súa valorización desenvolveuse durante os últimos meses do pasado ano e o primeiro trimestre de 2019, un período no que diversos profesores da EPS de Enxeñaría da USC visitaron aulas de múltiples centros de primaria na cidade de Lugo para dar a coñecer a nenos e nenas as actividades que se están a desenvolver no proxecto LIFE Lugo+Biodinámico, unha actuación que recibe fondos da UE e a través das que se pon en valor os recursos naturais dos que dispoñemos, como a madeira, as castañas, as áreas húmidas, a biodiversidade e como se integran a través dun urbanismo sostible na cidade.

 

As actividades realizadas, nas que tomaron parte máis de 750 alumnos de 1º e 6º de primaria, desenvolvéronse nos colexios de CEIP Albeiros, CEIP As Mercedes, CEIP Illa Verde, CEIP As Gándaras e CEIP Anexa. As temática das intervencións conducidas polos profesores da USC que tomaron parte nesta campaña arredor do LIFE Lugo+Biodinámico, é ampla e incluíu actividades interactivas que diversas que abranguen desde a identificación de zonas húmidas, análise de diferentes follas e flores de árbores, reconto de aneis dos troncos das árbores para avaliar o seu crecemento, estudo e aprendizaxe das características de diferentes tipos de solo a través da súa cor e textura, localización de animais na área húmida localizadas no espazo natural comprendido entre As Gándaras e O Ceao, ou a plantación dun chopo para realizar logo o seguimento do seu crecemento.

 

O proxecto LIFE Lugo+Biodinámico pertence ao programa LIFE da Unión Europea dedicado ao Medio Ambiente e, nomeadamente, á acción contra o Cambio Climático. Este proxecto, que tamén recibe financiamento da Deputación Provincial de Lugo, está impulsado e coordinado polo Concello de Lugo, que conta coa USC e a Politécnica de Madrid como entidades beneficiarias.

 

A diversidade das accións realizadas pola USC nos centros educativos da capital luguesa para sensibilizar a escolares sobre a importancia da conservación do medio ambiente e tamén sobre a importancia e valor dos recursos naturais permitiu tamén dar visibilidade ás múltiples actuacións realizadas ao abeiro deste programa europeo. O abano de accións xa executadas co Lugo+Biodinámico contempla intervencións de silvicultura de frondosas autóctonas no medio urbano, unha parcela de cultivos enerxéticos, plantación dun souto con variedades galegas de castiñeiro, a creación dun Arboretum con plantas leñosas autóctonas, a recuperación e posta en valos de bosques de ribeira, a construción en madeira do edificio Impulso Verde, hortos urbanos e unha planificación urbanística da cidade de Lugo con criterios de sustentabilidade.


Outras imaxes