Saltar ao contido principal
Xornal

Mateo Toro e David Sande, de Santiago, e David Fernández, de Lugo, gañan a X Olimpíada Galega de Economía celebrada na Facultade de ADE

Os estudantes de Bacharelato no Colexio Peleteiro, IES Rosalía de Castro e IES Xoán Montes, competirán na XI Olimpíada de Economía que se celebrará en xuño en Madrid

Actualizada: 16-04-2019 10:28
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Participantes e organizadores das probas da X Olimpíada Galega de Economía celebrada na Facultade de ADE do campus de Lugo

Os estudantes de Bacharelato Mateo Toro Diz, do Colexio Peleteiro, David Sande Rúa, do IES Rosalía de Castro de Santiago, e David Fernández Rodríguez, do IES Xoán Montes de Lugo, proclamáronse, respectivamente, campión, subcampión e terceiro clasificado da X Olimpíada Galega de Economía, un certame de carácter académico celebrado na Facultade de Administración e Dirección de Empresas do campus de Lugo da USC e no que tomaron parte máis de 60 alumnos e alumnas de Bacharelato que xa completaron ou están a cursar a materia de Economía e Empresa nunha ducia de centros educativos de Galicia.

 

Os tres estudantes que quedaron mellor clasificados nas probas celebradas o venres o pasado na Facultade de ADE do campus de Lugo da USC recibiron como agasallos cadanseu reloxo de última xeración, ao tempo que formalizaron a súa clasificación para participar na XI Olimpíada Española de Economía, unha proba de ámbito estatal que se celebrará os días 24 e 25 de xuño na Facultade de Ciencias Económicas e Empresariais da Universidade Complutense de Madrid e que se encadra no contexto da celebración do 70 aniversario deste centro universitario madrileño.

 

As persoas mellor clasificadas neste campionato nacional terán a oportunidade de acudir á fase internacional da Olimpíada de Economía que se celebrará na capital de Rusia ao longo do mes de xullo. Antes de desprazarse ata Moscova, o grupo de estudantes que represente a España nesta cita deberá completar un curso previo de formación de carácter gratuíto e que se desenvolverá nas instalacións da Universidade Complutense de Madrid.

 

A vicerreitora de Coordinación do campus de Lugo, Montserrat Valcárcel Armesto, e a decana da Facultade de Administración e Dirección de Empresas do campus de Lugo da USC, Begoña Barreiro, ofreceron unha breve recepción á delegación de estudantes preuniversitarios que participaron na X Olimpíada Galega de Economía, un certame celebrado por segunda vez no campus lugués, no marco dun acto de benvida no que tamén participaron o vice decano da Facultade de ADE da USC, Fernando Losada; o coordinador no campus de Lugo do programa A Ponte entre o ensino medio e a USC, Francisco Javier López González, ademais doutros profesores da Facultade de ADE que se ocuparon de supervisar a celebración das probas, así como a posterior corrección dos exercicios realizados.

 

A Olimpíada de Economía nace seguindo a tradición do resto das olimpíadas científicas pero, a diferenza delas, está organizada polas facultades de ciencias económicas e empresariais das universidades públicas españolas, e nestes momentos pódese dicir que xa está consolidada en todo o territorio español. É un concurso de carácter académico e educativo, con múltiples obxectivos entre os que estarían incentivar e estimular o estudo da Economía entre os alumnos interesados nesta materia, premiar o esforzo e a excelencia académica, divulgar os estudos de Economía, tender pontes entre as facultades e os centros de educación secundaria e establecer vínculos cos profesores de Economía do bacharelato.

 

A Universidade non pode abstraerse dos problemas formativos dos estudantes que van ocupar as súas aulas no futuro, e por iso é importante fomentar os contactos e as relacións estables orientadas a facilitar o intercambio de coñecementos e experiencias. Nese senso, a Olimpíada de Economía ten que xogar o papel de punto de encontro entre ambos niveis educativos.