Saltar ao contido principal
Xornal

As saídas profesionais e a formación de posgrao en Relacións Laborais e Recursos Humanos centran un foro no campus de Lugo

A xornada, promovida pola Área de Orientación e Inserción Laboral da USC celebrarase o 30 de abril, a partir das 9.30 horas, na Escola Universitaria de Relacións Laborais

Actualizada: 26-04-2019 11:29
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Programa da xornada

As saídas profesionais que ofrece o título de grao en Relacións Laborais e Recursos Humanos centrarán o martes 30 de abril, a partir das 9.30 horas, un foro informativo e de análise no salón de graos da Escola Universitaria de Relacións Laborais do campus de Lugo. Esta actividade, promovida polo centro universitario lugués en colaboración coa Área de Orientación e Inserción Laboral da USC é de acceso libre e de balde para todas as persoas interesadas.

 

A directora da Academia Postal, Gélica Cendán, abrirá a quenda de intervencións desta xornada cun relatorio sobre o acceso á administración pública. A continuación, dende o Colexio de Graduados Sociais de Lugo abordarase o exercicio da profesión de graduado/a social. O exercicio profesional na empresa será o eixe temático da mesa redonda na que intervirán como relatores Mónica González Dorado, responsable de RRHH na empresa ABANTE B.P.O.; Pilar Delgado Jul, do Departamento de Administración do Hospital Ollos Grandes, e Alberto Pallín Novo, responsable de Organización e Seguridade da Caixa Rural de Lugo.

 

A técnico da Área de Orientación e Inserción Laboral da USC no campus de Lugo, Gloria Cruz Amil, ofrecerá a mediodía unha charla informativa sobre as pautas a seguir para a procura de emprego. A xornada pecharase xusto a continuación cunha sesión dedicada á formación de posgrao, na que intervirán como relatores Guillermo Álvarez de Neyra, coordinador do Máster Paulo Fabio en Dirección de Recursos Humanos, e Ana Victoria Santín Sánchez e María Gómez Barreiro, en representación do Máster de Orientación Laboral e do Máster en Igualdade de Oportunidades e Xénero na empresa.