Saltar ao contido principal
Xornal

A USC reforza a súa oferta de postos de estudo en época de exames con 440 novas prazas en Dereito

Estarán dispoñibles en fins de semana e festivo en horario de 10.00 a 22.00 horas a maiores das dispoñibles en horario normal nos centros e dos postos en horario extraordinario de apertura

Actualizada: 23-05-2019 14:09
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Imaxe de arquivo da Sala de Estudo da Facultade de Dereito

O alumnado da USC contará con 440 novos postos de estudo na Facultade de Dereito durante as próximas fins de semana e festivos. A medida pretende reforzar a oferta de prazas que a USC pon a disposición do alumnado durante o período de exames e, particularmente, atender a demanda nos momentos de maior ocupación na Biblioteca Concepción Arenal durante o período de apertura en horarios extraordinarios.

Actualmente, a Biblioteca Universitaria ten a disposición da comunidade universitaria 6.522 postos de lectura en horario normal. Ademais, en horario extraordinario, deste total ofértanse 2.599 postos que se distribúen entre a Biblioteca Concepción Arenal (950 postos), Biblioteca Intercentros (1.119), biblioteca da Facultade de Ciencias Económicas (316) e Biblioteca Xeral (214), aos que agora se sumará os 440 novos postos en Dereito.

Horarios extraordinarios
A Biblioteca Universitaria mantén aberto dende o pasado mes de abril e ata o próximo 19 de xullo, coincidindo coa época de exames, o período de apertura en horario extraordinario. Así, as salas de estudo de distintas bibliotecas dos campus de Santiago e Lugo amplian os seus períodos de apertura sumándose ás dos propios centros que manteñen o seu horario habitual.

Na actualidade e ata o próximo 14 de xuño, a Biblioteca Concepción Arenal en Campus Vida permanece aberta 24 horas ao día e a Intercentros de Lugo manterá os horarios ampliados de 8.30 a 3.00 durante a semana (a partir das 9.00 horas dende o 1 de xuño) e de 10.00 a 3.00 en fins de semana e festivos. De xeito complementario, entre o 1 de maio e o 9 de xuño, ás anteriores sumaranse a modo de reforzo durante as fins de semana e en festivos a biblioteca da Facultade de Ciencias Económicas e Empresariais, a Biblioteca Xeral e a Sala de Lectura da Facultade de Dereito que abrirán de 10.00 a 22.00 horas. A estas, agora súmanse tamén os novos 440 postos na Facultade Dereito.

Do 14 de xuño ao 19 de xullo
Neste último período, tanto a Concepción Arenal como a Intercentros abrirán de luns a venres de 9.00 a 3.00 horas e en fin de semana e festivos de 10.00 a 3.00 horas. Na web da Biblioteca Universitaria da USC poderás atopar máis información sobre os distintos horarios de cada centro.