Saltar ao contido principal
Xornal

O Cluster Bio, liderado pola USC, suma un Hub biotec-nolóxico máis na Zona Franca de Vigo

Actualizada: 10-07-2019 13:37
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

De esquerda a dereita: José Luis Villaverde; David Regades, delegado do Estado na Zona Franca de Vigo; Juan González, alcalde de Nigrán; e Filipa Sacadura, secretaria xeral de P-Bio

O Clúster Transfronteirizo Biotecnolóxico (CT-Bio) acaba de presentar na Zona Franca de Vigo un novo Hub biotecnolóxico, que se une así á Rede CTBio-Labs para o impulso do sector biotech e que xa conta con instalacións na USC, na Universidade do Minho e no Laboratorio Internacional de Nanotecnoloxía de Braga.  O CT-Bio vai servir de apoio para detectar e madurar proxectos de cara á súa presentación na candidatura da Bioincubadora, a aceleradora de alta tecnoloxía de proxectos biotecnolóxicos da USC. No acto de presentación interveu José Luis Villaverde Acuña, director da Área de Valorización, Transferencia e Emprendemento da universidade compostelá (AVTE), destacando que “esta Rede de Hubs de Biotecnoloxía do proxecto CT-Bio, encaixa perfectamente na Estratexia Galega de Impulso á Biotecnoloxía e dálle un alcance transfronteirizo ao coordinar infraestruturas e capacidades de Galicia e Norte de Portugal”.

O proxecto CT-Bio enmárcase dentro do Programa Interreg V-A España-Portugal  (POCTEP) e ten como obxectivo o “crecemento integrador a través dunha cooperación transfronteiriza a favor da competitividade empresarial” na procura do “desenvolvemento e a implementación de novos modelos empresariais para as Pemes, en particular a internacionalización”. Trátase dunha aposta por relanzar un sector "en auxe que é moi transversal e que inflúe noutros subsectores importantes na economía da Eurorrexión, como son o forestal, o marítimo-pesqueiro, o alimentario ou o farmacéutico, entre outros".

Os seus obxectivos son mellorar a competitividade das empresas do sector e favorecer o acceso conxunto a mercados exteriores, xunto coa consolidación do sector biotech e das ciencias da vida na región transfronteiriza cunha folla de ruta conxunta e baseada na colaboración e cooperación entre axentes e empresas a ambos os dous lados da fronteira.