Saltar ao contido principal
Xornal  »  Desenvolven na USC novos métodos para localizar e avaliar danos estruturais en aeroxeradores

Desenvolven na USC novos métodos para localizar e avaliar danos estruturais en aeroxeradores

Actualizada: 16-03-2017 14:07
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Ana Gómez (segunda pola dereita) co director da tese e os membros do tribunal

O auxe da enerxía eólica e a conseguinte proliferación de aroxeradores na paisaxe galega fai que a ciencia se preocupe cada vez máis pola súa mellora e optimización. Así, a matemática da USC Ana Gómez González desenvolveu e validou na súa tese de doutoramento varios métodos para detectar, identificar e localizar danos en diferentes estruturas eólicas, como torres e palas de laboratorio.

Nos métodos de detección tradicionais empregados ata agora, un cambio nas condicións medioambientais (temperatura, humidade) pode levar a unha falsa alarma, é dicir, á detección dun dano inexistente, cos custos que isto supón. As novas metodoloxías desenvolvidas agora pola doutora da USC son mesmo capaces de detectar o dano “ante os cambios de temperatura ou a presenza de auga pulverizada”, explica.

Ruídos e vibracións
Baseada no mesmo tipo de técnicas que as anteriores, Ana Gómez traballou ademais nunha metodoloxía para identificar as fontes predominantes de ruído e vibración con sinais non estacionarias. En particular, estas técnicas aplicáronse a medidas realizadas nun entorno de laboratorio cunha fonte en movemento e tamén nun ascensor real (micrófonos e acelerómetros colocados no motor, poleas, sistemas de guiado,…). Con isto conseguiuse identificar o motor como a principal causa do ruído percibido na cabina dun ascensor e as poleas como a principal causa da vibración desta.

A tese, desenvolvida dentro do programa de doutoramento en Métodos Matemáticos e Simulación Numérica en Enxeñaría e Ciencias Aplicadas, demostra como as matemáticas poden contribuír na resolución de problemas industriais, neste caso centrados nos ámbitos da enerxía eólica e da elevación.

O traballo ‘Time series methods for SHM applications and multiple coherence computations: assessment in real and laboratory conditions’ dirixiuno Jerónimo Rodríguez e desenvolveuse nunha colaboración entre a Universidade de Santiago de Compostela, o centro de investigación IK4-IKERLAN e a Universidade de Patras (Grecia).

O tribunal que lle concedeu a cualificación de sobresaliente estivo constituído polo catedrático da Universidade Politécnica de Cataluña José Rodellar; o enxeñeiro investigador do Grupo de Innovación de Bruel And Kjaer Sound and Vibration Measurement, Dmitri Tcherniak; e a profesora do Departamento de Estatística, Análise Matemática e Optimización da USC, Rosa Crujeiras.