Saltar ao contido principal
Xornal

A USC impartirá un curso que capacita o profesorado técnico para impartir docencia en FP

Trátase do único curso universitario destas características en Galicia

Actualizada: 28-07-2017 13:24
Comparte esta noticia en Facebook Comparte esta noticia en Del.icio.us Comparte esta noticia en Meneame Comparte esta noticia en Google Bookmarks Comparte esta noticia en Yahoo

Para impartir docencia en FP, a Lei Orgánica de Educación (LOE) de 2006 establece os mesmos requisitos que para ESO e Bacharelato e que son posuír o título de licenciado, enxeñeiro ou arquitecto ou o de grao equivalente, ademais da formación de posgrao necesaria. Porén, este requisito non o pode cumprir o corpo de profesorado técnico de FP, dado que ao ser titulados de formación profesional non poden acceder a un master universitario.

Así, para estes casos nos que se posúa unha titulación declarada equivalente para a docencia pero sen acceso a estudos de master, a Universidade de Santiago de Compostela comeza a ofrecer este ano académico 2017-2018 o Curso de especialización en formación pedagóxica e didáctica do profesorado técnico de Formación Profesional, o único que se imparte en Galicia e que a Xunta de Galicia validou esta mañá coa sinatura dun convenio entre reitor da USC, Juan Viaño, e o conselleiro de Cultura, Educación e Ordenación Universitaria, Román Rodríguez.

Con este curso “dáse resposta á necesidade de formación en competencias pedagóxicas dun profesorado concreto”, explicou Viaño. Trátase dun requisito legal, en primeira instancia, dixo, “ pero tamén dunha demanda do profesorado xa en activo ou con perspectivas de incorporación aos cadros docentes da formación profesional”. Pola súa banda, o conselleiro indicou que o curso da USC dará “solución” a casos de certas especialidades do corpo de profesores técnicos de FP, como pode ser o dos ciclos superiores das familias de Imaxe persoal ou Mantemento de vehículos. 

Recollido na programación de títulos propios da USC, o curso sae cunha oferta inicial de 60 prazas e unha duración de seis meses, con metodoloxía semipresencial. Dirixido polos profesores Antonio Rial e Carmen Sarceda, incluirá un programa de prácticas externas para o que tamén se contará coa colaboración da Consellaría de Educación.

Ademais do conselleiro e o reitor, no acto de sinatura estiveron presentes o vicerreitor da Oferta Docente e Innovación Educativa da USC, Roberto Javier López; os directores do curso; a directora do Centro de Estudos Propios da USC, Ana Díaz; o director xeral de Educación, FP e Innovación Educativa, Manuel Corredoira; o subdirector xeral de Ordenación e Innovación Educación e Formación do Profesorado, Manuel Vila; a xefa do Servizo de Formación do Profesorado, Fátima García; e o xefe do Servizo de Xestión da Formación profesional, José Jardón.

 

Outras imaxes